War for the Planet of the Miners

By Bonie Esmera

Sounds familiar? Tan-aw nya mo ining sineha, coming soon. This is a true story. Nahitabo na ni sa atong lugar-sa kabukiran ug kalasangan. Ang casualty: ang kinaiyahan ug kaugmaon sa sunod generation.

Sukwahi sa original nga “planet” diin ang mga apes intawon papason sa ilang gipuy-ang planeta’ng kalasangan, ang giyera dinhi sa “planet of the miners” ang mga dagkong minahan mao ang mopapas sa kalasangan, apil siyempre ang mga gagmay’ng tawo sa kabukiran-una sila pa-trabahoon kunohay matag upat ka bulan.

So, kinsa ma’y mangtas dinhi? Obvious ba? Sumala, tan-awa-kung ipakita nila- ang kaupaw,ka-pahak-pahak,kapatag sa kabukiran. Naa pa kahay mabuhi ini? Duna pa kahay kaugmaon ini?

Pangutan-a ang cabinet secretary, ang kingkongresman, ang gobernador, ang mayor nga mahilig og pamalit og boto sa ilang constituents. Karon, duna pa kahay constituents mabiling mag-ginhawa kung patag na tanan?

Aw, makaon na man tingali ang balas ug makitkit na ang mga bato karon human ma-open-pit mining. Puwedi na sigurong ma-prito ug ma-sabal ug ipakaon sa tanan involved sa mining industry.

Gipamutol naman ang mga kahoy, nanglayas na ang mga baboy-ihalas, unsa pa may kaonon? Hulat na lang pud sa flashfloods aron ma-busy kintahay ang taga-gobyerno ug mangayo si gob of financial assistance. Maka calamity loan na pud!

Mao ni ang giyerang giluto sa mga miners nga kakunsabo sa mga pinalanggang trapo sa mga tawo. Walay mahimo ang mga pobre sa bukid kay wala man silay tingog ug kaisog bisan mangutana man lang og ngano man.
Hatagan lang sila og sensilyo, hatagan og pa-miesta, aw, human na, solbad na ang problema sa mga gamhanan.

Kasakit tan-awon ang mga tinapok nga yuta ug balas nga dalhon sa laing nasud sakay sa dagkong tanker. Pero mao lagi, kuwartang nag-awas-awas sa mga piniling anak sa diyos nga nagpuyo sa mansion samtang ang mga “apes” walay klarong kaugmaon kay oyayod lang permi.

Kung buhi pa lang si Fernando Poe Jr, siguradong siya ang mo-lead actor ini aron pang-kulatahon ug pamosilon niya ang mga hakog ug nagpaka-aron-ingnon.

Pero kay hapit naman pud ang “Darna” ni Liza Soberano, unta apilon niyag kumbati ug pukanon ang mga tawong namaligya, nitabang ug guba sa kalasangan ug panit sa kabukiran.

Darna, paminaw- mas delikado na sila sa imong kontrang babaeng ahas! Mas poisonous na sila. Tan-awa ang kasubaan, naglutaw na ang mga isda.

Akong gi-awhag ang madlang people na manan-aw ta ining pelikulaha aron masinati ug makabalo gyud ‘ta ug dili mailad, madani kung unsay mahitabo sa atong kalibutan kung zero-balance na ang kabukiran.

Pero kung mag-tree-planting naman sila human buslotan ug painitan ang palibot, aw, aw, kaon lang sa mga constituents og bato ug balas—samtang maghulat og pamunga ang mga kahoy.

  •  
  •  
  •  
  •  
  •  
  •  
  •  
  •  

Leave a Reply

Your email address will not be published. Required fields are marked *


TOP