Skip to content

Vice Mayor Joboy gipa-resign kay ‘wala’y kabangkaagan’ pagpadagan sa konseho

Ni Angel Fuertes-Gaviola


Gibaliwala ug gikataw-an lang ni Vice Mayor Jose “Joboy” Aquino ang hagit ni City Councilor Nestor Amora moluwat kini sa pwesto tungod sa daw kawalay hanaw ug kabangkaagan pagpadagan sa konseho. Skeptica

Gihagit ni “suspended” Association of Barangay Captains (ABC-Butuan) President ug City Councilor Nestor Amora si Vice Mayor Jose “Joboy” Aquino nga mo-resign sa pwesto gumikan wala matud pa kini hanaw ug kabangkaagan pagpadagan sa lokal nga konseho.

Segun ni Amora, ang gihimong pagpasa o pag-aprobar ni Aquino sa resolution nagsumikad sa committee on good government diin nagrekomendang e-suspende siya isip kapitan sa Barangay Banza, solidong manifestasyon nga daw wala kini hanaw ug ignorante sa balaod.

“Dili kamao magpreside, dili kamao unsaon pagtan-aw sa mga butang pagresolve diha sa Sangguniang Panglungsod and he has no business being there. Kung dili ka kamao magresign ka, I am calling Joboy Aquino kung dili ka marunong vice mayor magresign ka diyan, nakakahiya ka,” banat ni Amora.

“Pati ba naman pag-remove ng ABC president hindi alam na, hindi pwede yan. Dili gyud na pwede, yet gi-allow nimo (Aquino) na , so unsaon pagrespeto sa mga tawo nimo ana dinhe sa Butuan, nagpakaulaw raka sa imong posisyon,” dugang ni Amora.

Sa iyang bahin, gibaliwala ug gikataw-an lang ni Vice Mayor Aquino ang hagit ni Amora.

Ingon ni Aquino, nga nagsilbing congressman sa Butuan sa duha ka termino , dili niya patolan ang maong hagit pagpaluwat kaniya sa posisyon, sanglit wala kini pulos ug kapa-ingnan.

“Binata mana. Dili ko mopatol ana kay dili angay istoryahan. Wala nakoy mahimo ana,” sulti ni Aquino sa pakighinabi sa Periodico.

Tungod sa reklamong gipasang-at sa iyang mga konsehales nag-ugat sa alegasyon pagmaniubra’s mga proyekto sa Barangay Banza, gipahamtungan sa city council og 2-month preventive suspension si Amora bag-ohay lang.

Sa kasamtangan, perma nalang ni Mayor Ronnievic “RCL” Lagnada ang gihulat aron hingpit nang ma-implementa ang suspension order kang Amora, nga nag-inusarang tinggog sa opposition sa 12-member council ug iladong saligando ni former Butuan Mayor Ferdinand Amante, Jr.

Sumala pa ni Amora, krusyal matud pa ang papel sa usa ka vise mayor, isip presiding chairman sa legislative council sa pagpanday mga ordinansa, resolution ug uban pang gimbuhaton para sa kaayohan ug kalambuan sa dakbayan,

Apan sa daw gipakitang makadismayang abilidad ug liderato ni Aquino, batbat ni Amora, nabutang daw sa alanganin ug nayatakan ang integridad ug reputasyon sa konseho.

“Arrogant, mga arogante ni nga mga tawhana that’s why wala akong respeto gyud aning SP. Kining atong vice mayor si Joboy Aquino , he has brought the dignity of the city council to its lowest esteem grabe gyud, pinakamababa na talaga,” dugang ni Amora, nga gitawag “political persecution” o pagpanglutos sa mga supporters sa kanhi administrasyon ang gihimo kaniya.

Leave a Reply

Your email address will not be published. Required fields are marked *