Probe on gov’t hospital over Surigao baby’s death ongoing

Ni Angel Fuertes-Gaviola

Gihulat pa karon sa Department of Health (DOH-Caraga) ang resulta sa imbestigasyon sa Caraga Regional Hospital (CRH) sa Surigao City kalabot kamatayon batang pasyente nga gika-ingon napasagdan sa personahe’s nasangpit tambalanan.

Segun ni Dr. Cesar Cassion , assistant director sa DOH-Caraga, magbase ang himoong askyon sa buhatan batok sa gitudlong mga responsible sa insidente sa mamahimo unyang resulta sa gihimong pakisusi gikasa sa mga kadagkuan sa CRH.

“Any time soon moabot natong report sa ilang investigation kay syempre dili man nato madiresto og ingon nga naay sayop ang kinsa man, kinsa na sila hangtod dili pod nato makit-an unsa pod ang nahitabo during that time didto gyud sa hospital kung unsa gyud ang mga nahimo sa mga personnel staff didto sa hospital staff adtong panahona,” saysay ni Cassion.

Pina-agi sa maong internal investigation sa CRH, makita unya sa DOH, nga maoy naay superbisyon sa maong ospital kon aduna bay basehan ug igong kapasikaran ang alegasyon sa pamilya biktima, ingon ni Cassion.

“Kung siguro base sa investigation pa gihapon unsay findings nila makita nato unsay next action anang hitabo. Kay ang sa side raman to sa parent ang nakuan so gusto pud nato masayran ang side sa mga staff didto sa hospital,” ingon ni Cassion.

Nasayran, daling mikatap ang reklamo sa usa ka Marilou Lolo sa social media human gi-post niini ang nadangatan kamatayon sa iyang 7 ka bulan nga bata sa kamot hospital staff sa CRH Disyembre 17, 2016.

Sa reklamo ni Lolo, wala matod pa gi-atiman ug gipasagdan lang sa miatender personahe sa Emergency Room ang iyang anak nga nagka LBM, resulta migrabe ang kahimtang sa bata ug wala na natabang.

Apan sumala ni Cassion, sahi sa alegasyon sa pamilya Lolo, gi-atiman matud pa sa mga staff sa CRH ang batang pasyente sa dihang gidala kini sa ER.

“Pero so far sa initial nga information nga nakuha pa lang namo naa may nag-attender gyud dayon sa pasyente sa emergency room kay nakita man pod nila unsa ang kondisyon sa bata so murag standard operating procedure man gud na sa ER nga kung naay mga grabi gyud nga mga kaso ilang unahon gyud na siya,” pasabot sa opisyal.

Sumala usab ni Cassion , dunay proseso kon gitawag nga “triaging” ang mga ospital , kung diin e-categorized una ang mga pasyente basi sa ilang medical kondisyon, ug kahimtang.
“Naa man gud mga procedures nga gina-follow ang usa ka hospital so ginatan-aw pagsulod pa lang nimo diha magtriage na sila, so na-categorized karon ang kinsa toy kumbaga nanginahanglan gyud kaayo og dili kaayo nanginahanglan tungod sa volume sa kadagahna kaayo nga pasyente nagasulod ilabina gyud sa public hospitals,” saysay ni Cassion.

“So usa man pud na nga mahatagan og serbisyo tanan dili man gyud dapat mabalibaran gani kanang ubang hospital moingon sila nga bahala’s sobra na sa ilang operating capacity modawat lang gihapon sa ngalan nga serbisyo ang ihatag nila,” dugang ni Cassion.

  •  
  •  
  •  
  •  
  •  
  •  
  •  
  •  

Leave a Reply

Your email address will not be published. Required fields are marked *


TOP