‘Pagkahimugso sa SRMI learning site-farm school dakong tabang mag-uuma’

Ang Demo Farm sa SR Metals sa Tubay, Agusan del Norte ang pinakaunang mamahimong learning site ug farm school sa kinatibuk-ang rehiyon.

Nagmalipayon ang katawhang Tubaynon sa pagkahimugso sa SR Metals, Demo Farm diin pormal kining gitunolan sa Certificate of Learning Site sa Agricultural Training Institute- Caraga (ATI-Caraga) pinaagi ni Robert T. Poculan, Jr., Training Superintendent II kaniadtong Hunyo 6, 2017 sa Training Center Demo Farm, Sitio Beto, Poblacion Dos, Tubay, Agusan del Norte.

Gidawat kini nila Engr. Noel Manrique, assistant resident manager ug Bb. Jacquelou G. Modar, assistant ComRel manager sa SRMI.

Saysay pa ni Modar, ang panglantaw nga mahimo kining Demonstration Farm-Learning Site, gipanghingusgan aron mahatagan og dakong pagtagad ang teknikal nga kahanas sa mga mag-uuma.

“Ug dili lamang kini alang sa katawhan sa lima ka barangay nga nahisakop sa Direct Impact Areas apan apil usab sa mga katawhan sa lungsod ug probinsya”, dugang pa sa opisyal.

Sumala usab ni Rolito Resullar, kagawad sa Barangay Sta. Ana, maayo ang maong lakang sa kompanya tungod kay dakong ihap sa populasyon sa lungsod ang mga mag-uuma.
Kahinumduman, nga maong demo farm aduna kini gidak-on nga kapin ektarya diin gisugdan kini sa pag-ugmad tuig 2014.

Busa mapasalamaton nalamang ang kompanyang SRMI sa paghatag og pagtagad sa ATI-Caraga ilabina sa paghatag og teknikal nga aspeto sa pag-improbar sa maong learning site.

Ang maong learning site certificate, usa kini nga sa mga rekisitos aron mamahimong opisyal nga farm school nga maga-abli og mga NC-II Courses may kalabutan sa pagpanguma.

Hisayran usab nga ang Demo Farm sa SR Metals sa Tubay ang pinakaunang mamahimong learning site ug farm school sa kinatibuk-ang rehiyon sa Caraga. Ni JD

  •  
  •  
  •  
  •  
  •  
  •  
  •  
  •  

Leave a Reply

Your email address will not be published. Required fields are marked *


TOP