Nasipit Mayor Corvera rebukes water district: Unsay water crisis?

Ni Daisy Saraon

Corvera

“Wala na, wala may problema sa tubig ang Nasipit. Sauna rato tungod sa huwaw ug wala na pod ta nag rasyon og tubig”.

Mao kini ang reaction ni Nasipit Mayor Enrico Corvera human walay lipod-lipod gikumperma sa Nasipit Water District (NWD) dunay nagtunhay nga water crisis sa lungsod.

Ingon ni Corvera, sukwahi sa pag-angkon sa NWD, wala’y problema ug “regular na” ang suplay sa tubig sa lungsod.

Ang dugay nang gimolo sa mga Nasipitnon nga kanihit sa tubig bunga lang matud pa sa huwaw o kainit sa panahon nga sarang naka-apekto sa tinubdan tubig sa NWD, dugang ni Corvera.

Sumala pa sa mayor, dili usab tinood nga kanunay lubog ug hugaw ang agas sa tubig gikan sa NWD subay sa gika-ingon water crisis sa lungsod .

“Naa pa gihapoy oras nga mo off , pero regular na siya, kay kana lagi gikan sa huwaw. Di man kay Nasipit ray naapektohan sa huwaw, pero karon nakabawi na. Kusog na ang among tubig”, asoy ni Corvera.

Kahinumduman , gi-angkon mismo sa pamunoan sa NWD nga nag-atubang na ang lungsod og crisis sa tubig tungod sa dili maayong “kahimtang” sa Watershed Area.

Segun pa ni NWD administrative services assistant Carol A. Vallecera, dili daw madali-dali ang pagsulbad sa maong suliran ug sa ilang tan-aw, molungtad pa sa pipila ka tuig adeser mahibalik sa normal ang sitwasyon.

“Dili jud dali-dali mabalik ang normal nga agas sa tubig kay tungod sa kahimtang sa Watershed area nga wala nay kahoy nga nagpugong sa tubig ngadto sa yuta. Unya mga pila pa jud ni katuig siguro una mabalik sa normal,” sulti ni Vallecera

Ingon ni Vallecera, wala nagpabaya ug gihimo na sa NWD ang mga tukmang lakang aron matuldokan na ang perwesyo’ng dala sa maong suliran, sama sa pagtukod mga bag-ong deep wells partikular sa may Barangay Kinabjangan.

Apela pa ni Vallecera sa halos 4,236 NWD concessionaires nga sabton una ang sitwasyon mentras hinay-hinay nilang gi-alibyohan ang hugaw, ug on and off awas sa tubig.

“Sa pagkakaron, gihangyo namo nga dapat mo- cooperate ug musabot ang mga konsumador kay gibuhat na namo ang tanan aron makahatag sa sakto nga serbisyo , kasaligan ug limpyo nga tubig sa lungsod sa Nasipit”, sulti Vallecera.

“Karon, naa nay kabag-uhan , unlike before nga ang atong tubig 2 to 4 hours nalang . Karon ni saka-saka na ang hours nga nay tubig. ”

  •  
  •  
  •  
  •  
  •  
  •  
  •  
  •  

Leave a Reply

Your email address will not be published. Required fields are marked *


TOP