Skip to content

Liboan magtutungha sa Tubay nakadawat og gamit pang-eskwela

Gikalipay sa mga elementaryang magtutungha sa Tubay, Agusan del Norte human nakadawat sa gi-apod-apod nga gamit pang-eskwela sa kompanyang SR Metals, Incorporated adlaw’ng Martes ug Miyerkules, Hunyo 14-15, 2017.

Mikabat sa 2,798 ka mga kabatan-onan nga nagtungha sa mga elementaryang nahisakop sa gideklarar nga direktang naapektuhan nga komunidad sa operasyon sa nasangpit nga minahan.

“Ato ning gibuhat aron mabuhi ang paglaom sa mga magtutungha, ilabina ang walay ikapalit nga ginikanan og mga gamit pang-eskwela. Nasayran pud nato sa niaging tuig, nga tungod sa atong pagpahigayon ani nga programa, mas nilambo ang numero sa magtutungha matag eskwelahan,” asoy ni SRMI-Community Development Officer Jinky Jovita atol sa pakighinabi ning mantalaan.

“Matag tuig nato usab kini gipahigayon sa mga sinagop nga mga eskwelahan ubos sa Adopt-a-School Program sa kompanya,“ dugang pa sa opisyal.

Mga eskwelahan diin nakadawat ang matag-usa nga magtutungha.

Kahinumduman, nga sa niaging bulan nag-apod-apod usab ang maong kompanya sa mga igsoong lumad nga Manobo ug Mamanwa sa lungsod sa Santiago ning probinsya.

Sa laing bahin, nakadawat usab ug gamit pang-eskwela, bag ug t-shirt ang mga kapin 900 ka mga gideklarang iskolar sa high school kaniadtong Hunyo 12, 2017.

Dako nalamang ang pasalamat sa mga benepisyaryo sa mga kaayuhan nga dawat gikan sa kompanyang SR Metals, Inc. sa Tubay, Agusan del Norte.

Leave a Reply

Your email address will not be published. Required fields are marked *