LEGAL CORNER: Kasabutan sa Panagbulag, Legal Ba?

Dear Atty. Bulang:

Mangayo unta ko og tambag nimo, sir. Dugay naming buwag sa akong asawa, 2013 pa. Nagbuwag mi sa maayong kabubut-on kay nagsabot mi nga wala mi hilabtanay. Aron klaro ang among sabot, ming-decide mi nga maghimo og kasabutan bahin niini, ug amo kining gipirmahan.

Gani man, witness pa ang among mga anak. Sa pagkakaron, aduna nako’y lain pamilya ug mga anak.

Bag-ohay lang, nakadungog ko og istorya nga pasakahan kuno ko og kasong kriminal sa akong ex-wife tungod sa akong pakig-ipon og laing babae. Akong pangutana, sir, mao ni, legal ba tong kasabutan nga among gipirmahan niadtong 2013? Ikaduha, dugay naman pud mi nga buwag, pwede ba nga magminyo nako og lain?

Palihug tambagi ko sir kay dili nako makatulog niining problemaha.

Daghang salamat sir.

 

Jun

Surigao City

 

**************************************

Dear Jun:

Unang-una, wala’y bisa kadtong kasabutan nga inyong gipirmahan sa imong asawa. Tungod kini sa rason nga ubos sa atong Family Code of the Philippines, ang kaminyoon, isip usa ka special nga kontrata, gidiktahan sa atong balaod ug dili pwede nga kini magdepende sa kasabutan ninyong duha.

Buot pasabot nga kamong mag-asawa wala gitugutan sa atong balaod nga magbuot-buot og sabot nga kamo magbuwag na kay wala’y laing makapabuwag ninyong duha kun dili ang korte lamang, subay sa lagda sa  Family Code.

Ikaduha, bisan og pila pa ka katuigan ang nanglabay, dili gyud maputol ang kaminyoon sa mag-asawa. Ang kadugayon sa panagbuwag dili igong rason nga pwede namo maminyo utro. Una ka ma-minyo pag usab, kinahanglan nga putlon usa ang inyong kaminyoon. Imo kini mabuhat pinaagi sa pag-file og usa ka petition for annulment sa korte, kung aduna ka’y igong rason o grounds sa pagpasaka niini.

Kini nga opinyong legal base lang kini sa imong gisaysay. Pwede pa kini mautro kung aduna pa’y laing detalye nga madugang.

Hinaut unta natubag nako imong pangutana.

 

Atty. Oliver C. Bulang

 

Editor’s Note: “Balaod Alang Sa Tanan, Dili Sa Pipila Lang” is a weekly column of Atty. Oliver C. Bulang.  A practicing lawyer, he is also an incumbent City Councilor of Cabadbaran City, Agusan del Norte.  If you need answers to your legal queries, concerns and questions, send them to atty.oliver_bulang@yahoo.com.

 

 

 

  •  
  •  
  •  
  •  
  •  
  •  
  •  
  •  

Leave a Reply

Your email address will not be published. Required fields are marked *


TOP