LEGAL CORNER: Custody battle: Grandparents vs mother

 

Dear Atty. Bulang:

Daghan kaayong salamat sa imong column diri sa News Courier. Nagkinahanglan ko sa imong tambag, Sir.

Naa ko’y anak sa uyab nako sa una pero dili mi minyo. Tungod kay mga bata pa mi adtong niburos ko, nagkabuwag mi ug naa sa ako ang bata. Mitrabahao dayon ko sa Malaysia isip domestic helper ug gibilin nako ang akong anak sa iyang amahan nga nagpuyo lang sad sa balay sa iyang ginikanan.

Samtang tua ko sa Malaysia, sige ko padala og sustento sa akong anak, hangtud nga nananghid ang amahan sa akong anak nga mo-abroad sad siya sa Saudi. Tungod kay wala na’y makabantay sa akong anak, ni-desisyon na lang gyud ko nga mo-uli sa Pilipinas.

Pero, attorney , dako gyud akong kasakit kay dili naman ihatag sa ginikanan sa akong ex ang akong anak kay kuno ingon sa ilang anak nga akong ex, sa ila kuno gibilin ang akong anak. Grabe nakong hilak Sir, nagpakiluoy, pero wala gyud.

Mi-ingon pa gyud sila nga kung ipugos gyud kuno nako pagkuha ang bata, ila kuno kong kasuhan ug sa korte na lang mi magkita. Nalibog na kaayo ko. Inahan man unta ko pero gikuhaan man ko nila og katungod sa akong kaugalingong anak. Makasuhan kaha ko nila, Sir? May laban kaha ko ani nila?

Tambagi intawon ko, Sir, sa akong pagabuhaton. Hangtud karon dili ko makatulog nga ang akong anak wala sa akong kiliran. Lima (5) na siya katuig karon.

 

Cheryl
Nasipit, Agusan del Norte

 

**************************************

 

Dear Cheryl:

Subo gyud kaayo pamalandungon imong sitwasyon. Pero ayaw’g kabalaka kay ang balaod mo-pabor gyud sa imo isip lehitimong inahan sa bata.

Subay sa mga provisions sa atong Family Code kabahin sa parental authority, ikaw gyud ug dili ang mga apohan sa bata ang aduna’y katungod sa bata. Tungod kini sa rason nga obligasyon sa mga ginikanan nga areglaron, suportahan, hatagan og igong pagsabot ug pang-gaon ang ilang mga anak. Wala’y si bisan kinsa nga makahatag sa tinuoray nga gugma ngadto sa mga anak kun dili ang tinuod nga ginikanan lang.

Dugang pa, kanang imong anak matawag nato nga “illegitimate child” kay dili man mo minyo sa amahan. Ingon sa atong Family Code, ang inahan lang gyud ang adunay parental authority sa usa ka illegitimate child. In other words, wala’y lain nga aduna’y katungod sa imong anak, ikaw lang gyud. Bisan ang ginikanan sa imong ex, wala’y katungod niana.

Base sa imong istorya, akong nakita nga morag dili na gyud ihatag sa ginikanan sa imong ex ang imong anak. Wala na ka’y lain mahimo niana kundili ang pag-file og Petition for Habeas Corpus batok sa ila sa korte.

Kini nga opinyong legal base lang kini sa imong gisaysay. Pwede pa kini mautro kung aduna pay laing detalye nga madugang.

Hinaut unta natubag nako imong pangutana.

 

Atty. Oliver C. Bulang

 

Editor’s Note: “Balaod Alang Sa Tanan, Dili Sa Pipila Lang” is a weekly column of Atty. Oliver C. Bulang. A practicing lawyer, he is also an incumbent City Councilor of Cabadbaran City, Agusan del Norte. If you need answers to your legal queries, concerns and questions, send them to atty.oliver_bulang@yahoo.com.

  •  
  •  
  •  
  •  
  •  
  •  
  •  
  •  

Leave a Reply

Your email address will not be published. Required fields are marked *


TOP