Drug test isip school admission requirement babagan Caraga youth group kung…

Ni Angel Fuertes-Gaviola

 

Suportado sa grupo sa kabatan-onan sa rehiyon Caraga kalabot ang gisang-at sugyot sa Commission on Higher Education (CHED) pagrequire sa tanang incoming students sa tertiary level nga mopailawom sa drug test.

Sumala ni Alvin Ygot, spokesman sa College Editors Guild of the Philippines (CEGP-Caraga), walay kwestyon alang kanila ang pagahimuong lakang sa ahensya oras nga kini maaprobahan sanglit suportado sab matod pa sa kabatan-onan ang kampanya sa panggamhanan batok ilegal nga droga.

Apan kung kini matod pa mamahimong dugang ra usab nga palas-onan ug balayronon sa mga magtutungha ngadtos mga unibersidad ug Higher Education Institutions’ (HEIs) ug dili kini sagubangon sa ahensya, nan kini mahimong dakong problema sanglit angay gayud kining babagan.

“Isip grupo sa mga magtutuon, dili kwestyon ang among suporta sa kampanya batok droga tungod ang mga kabatanonan ug ilang kaugmaon ang biktima niini. Pero ang pangutana ini kinsa ang magsagubang sa pagpadrug test? Kung dugang lang kini sa mga gipas-ang bayronon sama sa tuition ug development fee, angayan kini isalikway ug batukan,” matod ni Ygot.

Una nang gibutyag ni CHED executive director Julito Vitriolo nga gilantaw sa ahensya nga himuong usa ka requirement for admission ngadtos tanang incoming college students lakip na sa mga kasamtangang naka-enrol ang pagpa-drug test.

Gipa-abot sab ni Ygot unsa ang mamahimong unyang sukaranan higayong ang usa ka estudyante magpositibo kini sa drogas diin angayan sab matod pa nga adunay nakapreparar nga mga programa ang ahensya alang sa posibleng medikasyon.

“Ikaduha niini, unsa ang measures kung positibo ang usa ka estudyante. Aduna bay programa para siya madapatan ug medikasyon ug rehabilitasyon?,” asoy ni Ygot.

Dugang pa ni Ygot, dili gayud matod pa sila magpakahilom aron ipahayag ang ilang pakigbatok kon mapamatud-an nila nga ang maong lakang kabahin sa paagi aron ma-ila ang mga drug personalities luyo sa maka-alarma na nga mga kaso sa extra-judicial killings.

“Kung kini isumpay sa mga summary killings imbes na tabangan ug i-edukar, dili magpakahilom ang mga kabatan-onan ibutyag ang kining pasista nga pamaagi,” batbat ni Ygot.

  •  
  •  
  •  
  •  
  •  
  •  
  •  
  •  

Leave a Reply

Your email address will not be published. Required fields are marked *


TOP