Skip to content

Ayaw tunawa ang Caraga!

Commentary:

Ni Al Castillo

No way! Sigon sa among silingan sa dihang akong gipahibalo nga basin mapapas na ang Caraga Region sa mapa kay “tukbon” na sa taga-Davao aron maapil sa ilaha sa Federalism.

“Dili ta mouyon niini kay mawala ang atong identity nga usa ka malambuong rehiyon Mindanao,” ingon ni Manong. Dugang pa niya,”Kinsay nag-ingon nga pobre ta ug dato sila?”

Akong gi-ingnan nga mao man na ang gi-basihan sa taas ug basin wala ta mahimo niana.

“Mo-protesta ta.” Sugyot niya. Pero taudtaud, ning-kalma siya. Ingon niya,” Aw, tinuod man pud gamay nga ulahi ta sa pag-asenso pero dili tungod minos ang atong resources kung dili minos ang atong pang-gobyerno kay ubos man ta kanunay sa political dynasty.”

Panahon na kuno, sigon niya, alisdan na ang mga opisyalis nga usa ka pamilya o pabalik-balik, maong dunot kuno ang pamaagi ug walay klarong tinuyoan pang-katawhan.

Duna po’y laing ni-kumento nga okay lang kuno mapapas na ang Caraga aron paspas na ang asenso kay makahig na ta kay duol na man ta sa luwag!

Ambot lang sa luwag kung itom ba o dili…

Wa na lang ko mituboy, basta karong panahona, angay hisgotan kini sa taga Caraga aron madunggan pud ang ilang tingog,dili lang sa mga politiko nga walay klarong baruganan. Palingpaling ba.

Basin kung mag-federalism mao lang gihapong mga characters, unsa may atong mapaabot niini. Mura ra’g naligo pero walay ilis-ilis sa sinina, baho lang gihapon.

Pero in fairness ha, daghan baya ganahan sa konsepto sa federalism kay tinuod gyud kuno nga kabag-ohan.

Ilisdan man kuno ang pangalan o dili , walay problema basta lagsik ug brand new, murag born-again ug walay maligsan ug panggaon ang kinaiyahan, dili minahon hangtud maopaw.

“Insakto nang green economy nga panglantaw ug angay atong buhaton na kay buhong ta sa kinaiyahan nga gasa sa Diyos. Kinahanglan diha magsugod ang federalism sa Caraga,” paambit sa usa ka maestra.

Sa katapusan diay, akong nahunahuna, ma-ilisdan man ang pangalan o dili, ang importante, dunay klaro ug tinuod nga direction ug paglambo sa rehiyon.

Kana ang angay dili matunaw!

Leave a Reply

Your email address will not be published. Required fields are marked *