7 sa mga kolehiyong iskolar sa SR Metals, migradwar na

Mahayag nga kaugmaon ang mianinaw sa hulagway sa pito ka kolehiyong iskolar sa SR Metals human mipaso ug gikonpirmang gradwado sa ilang piniling kurso Hunyo 14-15, 2017 sa Sanchez Gymnasium, Caraga State University, Ampayon Campus, Butuan City.

Sigun pa sa mga iskolar dili lalim ang ilang giagihan ayha nakab-ot ang gihuptang mga diploma tungod kay dili man makaya sa ilang ginikanan ang galastuhan sa pagtungha sa kolehiyo.

“Dili gyud makaeskwela kay wala baya saktong kakuhaan akong mga ginikanan ug salapi aron ikagasto pero maayo na lang naghanyag ang SRMI ug scholarship program,” asoy ni Marie Jane Corpuz, usa sa mi-gradwar.

“Hayahay pa gyud kaayo kay libre ang tanan, gikan sa tuition ug miscellaneous fees, book allowance, dormitory, ug hangtod pa sa meal allowance. Igo na lang mi-mumata sa buntag ug mokaon ug diretso na dayon sa eskwelahan,” dugang pa sa maong iskolar.

Kahinumduman nga aduna nay 3 ka mga mi-gradwar nga iskolar usab sa maong kompanya ug hingpit na karun nga mga inhenyero nga kasamtangang nagtrabaho sa minahan sila si Engr. James M. Decalit, Engr. Arvin Lagulao ug Engr. Kenneth Prado.

Nakita sa SRMI ang kamahinungdanon sa maong programa busa padayon kining giapil sa Social Development and Management Program (SDMP) .

Sa pagkakarun, mikabat na sa 10 ang mga gradwado sa maong scholarship program ug padayon pa ang mga kasamtangang 38 nga nagtungha sa Caraga State University Ampayon Campus.

Padayon karun sa pagtungha sa review ang mga migradwar aron maandam sa umaabot nga Board Examination diin mao kini ang paningkamotan aron makahupot ug lisensya nga mahimong magamit sa pagpangaplay ug mga trabaho.

“Nagpasalamat ko nga nahatagan ko ani nga scholarship kay kung wala ang SRMI maglisod gyud ko ug eskwela kay si Lola ra ang nagbuhi sa ako,” pasalamat na lamang ni Ma. Elena Limbasan, isa sa mga migradwar. Ni JD

  •  
  •  
  •  
  •  
  •  
  •  
  •  
  •  

Leave a Reply

Your email address will not be published. Required fields are marked *


TOP